من مذكرات سلومة ( يااعجب من العجب العجاب )

فى احدى المقاهى المتطرفة فى بلدتى

يجلس ابناء محافظتى فى المقهى وكل واحد منهم منشغل فيما يخصة , فمنهم من هو منهمك فى لعب الدومنة ومنهم من قفلت الطاولة على صوابعة ومنهم اللى ماسك الشيشة وقال ايه بيشرب كرسى معسل وتلاقى فى النهاية انة خلص طقم سفرة بطرابيزاته .. مش مهم كل ده لكن المهم ان فى حاجة شدت انتباة الناس دى فجاه ... اية ياجماعة اللى حصل , قال شالوا الاهرامات من عجايب الدنيا السبع .. معقول ياجماعة

الاهرامات !!!!!

واحد قام وهات ياسب ولعن وشوية حود على الكوسة والقرع اللى دايما مظلومين فى المواضيع اللى زى دى ..

وواحد تانى لقيتة نط من على الكرسى . وعمال يصرخ بصوت عالى وافتكر نفسة عادل امام فى فيلم عماره يعقوبيان وعمال يقول.. ( احنا فى زمن المسخ ) ..

وواحد تالت شغال ينعى الحضارة المصرية وكان ناوى يحكى لنا تاريح السبع الاف سنه, يوم بيوم من اول الملك مينا لحد الملك حسنى مبارك ..

ماعلينا.. المهم انه فى وسط الدوشه والصياح ده خرج صوت هادى ورزين وكانة جيفارا فى اعظم خطاباته للشعب .( ياجماعة انتو مزعلين نفسكوا لية )

يفاجاء الجميع بان السيد سلومة هو الذى يتحدث ..

رجل فى الخمسون من عمره .. موظف حكومى يعتقد بانة كان من الافضل ان يكون حاكما لهذا الشعب وانة المختار لهم .. يعاملة الناس على انة مخبول ., الا ان الطرافة التى يتمتع بها وروح الدعابة التى لدية هى التى تجعل الناس تتحمل سخافاتة والتى لا اراها مجرد سخافة الا انها حكمة قوية ولكنها تخرج من مصدر غريب )

_ ثار الجميع علية واعادوا علية نفس الاستنكارات والشجب والادانات ..

وبصوت هادىء مرة اخرى اجاب الاستاذ سلومة ( ياجماعة هدوا اعصابكم شوية وانا هااقولكم على الموضوع من اوله )

هدء الناس قليلا وبدوا فى الانصات اليه , الا انهم مازالوا يتوقعون سخافة اخرى منه ...

اعتدل الاستاذ سلومة فى جلستة وكانة سيلقى الخطاب النهائى لمؤتمر القمة العربى المنعقد فى قهوة( بركة البط ) وده اسم القهوة التى تدور فيها الاحداث ...

وبصوت هادىء ورزين ( ياجماعة انا كنت مع الناس اصحاب لجنة التحكيم , والناس شرحوا لى وجهة نظرهم وانا بصراحة ليت ان عندهم حق ) ..

واللى هى اية ياعم الناصح ,. يقولها احد الجالسين بعد ان بدا ينفذ صبرهم

يرد الاستاذ سلومة بنفس الهدوء ., الناس اصحاب اللجنة لما نزلوا للقاهرة عشان يزورا الاهرامات اكتشفوا حاجة غريبة جدا ..

ووسط ذهول الجميع وتشوقهم لمعرفة الباقى وترديدهم فى نفس واحد ..( هى اية )

يخبرهم الاستاذ سلومة ان لجنة التحكيم لما نزلت القاهرة شافت ان القرارات الحكومية اللى عندنا اعجب بكتير من الاهرامات ... وعشان كدة شافوا انه من الحكمة انهم يشيلوا الاهرامات ويحطوا بدالها القرارات الحكومية ويبقى ادينا استنفعنا بحاجة منهم ...

ووسط ضحكات جميع من كان فى المقهى بدا الناس يفكرون فى الموضوع بحكمة المغلوبون على امرهم ويقولون ..( واللة عندهم حق . ده احنا كنا ظالمينهم بشكل )

المهم ياأستاذ سلومه وايه اللى حصل بعد كده .. يرددها جميع من كان فى المقهى ..

ولا حاجه ياجماعة , انا كمان شوفت ان الجماعة عندها حق فى الكلام اللى بيقولوه , بس انا كمان ركبتهم الغلط من ساسهم لراسهم ووقعت عليهم حق عرب ..

ازاى ياستاذ سلومة ., يرددها جميع الجالسين فى المقهى

انا ياجماعة قولتهم مادام قررتوا أنكم تشيلوا الاهرامات من عجايب الدنيا السبع , يبقى كمان لازم تشيلوا سور الصين العظيم من العجايب

اشمعنى ,,, يرددها الجالسين فى المقهى

هما كمان قالوا لى اشمعنى .. بس انا رديت عليهم وقولتلهم تعالوا شوفوا طوابير العيش عندنا وبعدين احكموا مين فيهم الاطول ....

تمت .... مع موعد اخر من مذكرات الاستاذ سلومة