اخيرا قررت انى اكتب ومش عارف السبب اللى خلانى امتنع عن الكتابة والسبب اللى خلانى ارجع تانى واكتب .. بس اكيد انة سبب نفسى لانه من الملاحظ على الايام دى انى بتحول للجنون وكتير من اصحابى نبهونى للموضوع دة ومش عارف مين اللى كان قالهم انى كنت عاقل قبل كده..
الخلاصه انى فى عجالة ها اطرح ثلاث تساؤلات طرات فى عقلى وحبيت انى اتكلم عنهم..
الموضوع الاول .....
ملحوظة غريبة طرات فى عقلى وانا اشاهد احدى الافلام الامريكية الصنع
مشهد يتكرر كثيرا فى تلك الافلام .. وهو مشهد لاحدى فتيات الليل او نوادى الاسترب
كثيرا من تلك الفتيات يرتدين ملابس داخلية .. عفوا ( بكينى ) , وليس هذا مايعنينى
الا ان معظم تلك الملابس تكون مصممة على هيئة العلم الامريكى .. وهذا مايعنينى
إن مااتحدث عنه هو رؤية المواطن لرمز الوطن الذى يقطنه , الا وهو العلم
فإذا كان الشعب الامريكى يعتز بعلم بلاده لدرجة ان يضعة تصميما على ملابسه بعيدا عن نوع تلك الملابس
وبعيدا عن ان هذا العلم الامريكى يذكرنا نحن العرب بملايين الضحايا من الشعوب العراقية والفلسطينية واللبنانية اذا وجد من العرب احد يتذكر ذلك او يشغلة الامر ..
كيف نرى نحن المصريين علمنا ونحن نراه يرفرف
هل هو رمز الحكمة والديمقراطية والسلام والعزه والعدل .... ام ماذا نرى فية ؟؟؟؟؟؟؟؟؟
الموضوع الثانى ....
مقالة لابراهيم عيسى بخصوص الموضوع المكرر بتاع بوش والبلغه .. اسف الحذاء
بس الغريب ان عمنا ابراهيم مش عاجبة الموضوع وبيقول مايصحش للشعب العراقى يعامل الضيف بتاعه كده لانها مش من اخلاق الاسلام ولا المسلمين .. طب ده بالزمه كلام
وهو من امتى بوش كان ضيف يعامل بإحترام .. الظاهر انك ياعم إبراهيم محتاج درس فى اصول الضيافة ...
وهو مش عيب برضة شتم الحاكم وسبة . مع ان ده مش من اصول الاسلام .. ومع ذلك كنا معاك وساندنا موقفك ...
ولا هو حلال علينا وحرام عليهم ... ياريت مانكونش مجرد معارضين ع الفاضى والمليان .. ياعم إبراهيم عيسى .. ولا انتو شايفين ايه ؟؟
الموضوع الثالت ...
والله مش عارف ... تخيلوا نسيت انا كنت عايز اكتب إيه
يلا مش مهم .. كفايه كده
وكل عام هجرى وانتوا بخير وسلام
