حكايات المساء

ليه دايما واحنا اطفال كنا بنعشق الحكايات فى الليل

كنا نتجمع حولين بعض تحت اى لمبه او على المصطبه اللى قدام البيت علشان نحكى حكاياتنا لبعض

او لما نحب نسمع حكايه من الوالد لازم تكون الحكايه دى قبل النوم

بصراحه انا مافكرتش فى الموضوع ده غير من قريب

وساعتها قولت يمكن عشان اليل ستر وغطا علينا... ولا علشان كلام الليل مدهون بزبده ولما يجى عليه الصبح يسيح .. مش عارف

بس لما كبرت والاحلام كبرت معايا .. السؤال برضه كبر معايا ..

لقيت ان اليل ماكنش مجرد وقت بيحلى فيه الكلام ... والسبب انى فى ليله من الليالى وكنت باليل برضه . قعدت ارجع كل شريط حياتى

كل تجربه مرت فى حياتى لقيت انها كانت بتحصل لى فى اليل

يعنى اول قصه حب فى حياتى حصلت باليل لما صحيت فجاه من نوم فى نص اليل ولقتنى بفكر فيها لحد ما النهار طلع على

ونفس قصه الحب دى انتهت برضه فى اليل لما رن الموبايل بتاعى وسمعت خبر انها بتتجوز دلوقتى

واول حلم فى حياتى كان باليل لما شوفت النجوم وحلمت انى امسكها بأيدى

واول صدمه لما اكتشف ان النجمه اللى كنت بحلم انى امسكها طلعت لمبه جاز ..وده اكيد لانى كنت باليل والجو كان عتمه

وحتى لما كنت بحب اسمع لعمرو دياب كنت بحب اسمع له فى اليل وانا قاعد فى البلكونه وقدامى فنجان القهوه والسيجاره فى أيدى

وقبل ما أنام اقلع هدومى القديمه كنت اقلعها فى اليل واقلع معاها كل حلم قديم انا حلمته واغيرها بهدوم تانيه وحلم تانى

.... بس بجد انا دلوقتى بقيت اخاف من الليل ..على قد ماعشقته .على قد ماكرهت انى اقابله ...لانه كان دايما بيعشمنى باحلام مابتكملش ....وأأأأأأأأأأأأأأأأه منك ياليل ..